Azərbaycanın işğal altında olan rayonlarının turizm imkanları araşdırılmışdır

Oktyabrın 20-də Beynəlxalq Mətbuat Mərkəzində Söz Azadlığını Müdafiə Fondu (SAMF) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə reallaşdırdığı “Şuşa və Ağdamın işğalına görə Azərbaycan və dünya turizminin mənəvi-maddi itkilərinin təhlili, təhlilin hesabatının ictimailəşdirilməsi” layihəsinin yekunları ilə bağlı tədbir keçirmişdir.
Tədbirdə dövlət rəsmiləri, Milli Məclisin deputatları, işğal altında olan rayonların mədəniyyət və turizm şöbələrinə rəhbərlik etmiş şəxslər, QHT nümayəndələri “Şuşa və Ağdamın turizm potensialı: faktlar və rəqəmlər” mövzusu ətrafında müzakirələr aparmışlar.
Layihənin rəhbəri Vüqar Tofiqli bildirmişdir ki, layihə çərçivəsində SAMF-ın əməkdaşları işğal altında qalan turizm obyektlərinin rəhbəri olmuş şəxslərlə görüşlər keçirmiş, obyektlərin siyahısını dəqiqləşdirmiş, habelə turizmin bölgəyə verdiyi illik gəlirlər haqqında məlumat toplanmışdır.
Eyni zamanda, regionun turizm imkanları araşdırılmış, ölkəmizə bu illər ərzində dəymiş ziyanın məbləği iqtisadçıların və inşaat mütəxəssislərinin iştirakı ilə hesablanmışdır. Toplanan materiallar virtual məkanda yayılmışdır.
Vurğulanmışdır ki, məqsəd Azərbaycanın işğal altında olan torpaqlarında potensial turizm məkanlarının gündəmə gətirilməsi, ölkəmizə dəyən maddi-mənəvi ziyanın dünya xalqlarının, beynəlxalq təşkilatların diqqətinə çatdırılması, Şuşa, Ağdam və digər işğal altındakı torpaqlarımızda qalan turizm obyektləri, tarixi, milli-mədəni abidələrimiz haqqında gənc nəsillərə məlumat verilməsidir.
Qeyd olunmuşdur ki, Azərbaycanın tarixi mədəniyyət mərkəzi Şuşa, eləcə də təbii gözəlliklərlə zəngin olan digər rayonları ermənilər tərəfindən xarabalığa çevrildiyindən yerli və xarici turistlər bu füsunkar məkana səfər etmək imkanını itirmişlər.