Ulu Öndərimiz Heydər Əliyevin anadan olmasının 93-cü ildönümü
06 may 2016-cı il tarixdə Ulu Öndərimiz Heydər Əliyevin anadan olmasının 93-cü ildönümü münasibətilə “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi və Şuşa Rayon İcra Hakimiyyəti Yeni Azərbaycan Partiyası (YAP) Şuşa rayon təşkilatı ilə birlikdə “Nəsillərə nümunə olan şərəfli ömür yolu” adlı konfrans keçirilmişdir. Əvvəlcə, konfrans iştirakçıları Ulu Öndər Heydər Əliyevin büstü önünə tər çiçəklər düzərək xatirəsi yad etmişlər.
Konfrans iştirakçıları Ulu Öndərin həyat və fəaliyyətinə həsr olunmuş filmə baxdıqdan sonra bəstəkar Sevinc Tofiqqızının Ulu Öndərim- “Xatirələr” kompozisiyası təqdim olunmuşdur.
Konfransı açan Şuşa Rayon İcra Hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin rəhbəri Bayram Səfərov “Heydər Əliyev və milli xilaskarlıq missiyası” mövzusunda çıxışında qeyd etmişdir ki, görkəmli dövlət xadimi, dünya miqyaslı siyasətçi, Azərbaycan milli dövlətçiliyini bütün təhlükələrdən xilas edib qoruyan və inkişaf etdirən qüdrətli və müdrik şəxsiyyət Heydər Əliyevin həyat və fəaliyyəti müasir tariximizin ən mühüm və şərəfli mərhələsini təşkil edir. Heydər Əliyev bəşər tarixinin nadir şəxsiyyətlərindəndir ki, onun özündən sonra qoyub getdiyi ideyaları nəinki doğma məmləkətimiz üçün, o cümlədən dünya ölkələri üçün də böyük əhəmiyyət kəsb edir. Bayram Səfərov daha sonra qeyd etmişdir ki, Ümummilli liderimiz Heydər Əliyev Azərbaycana rəhbərliyinin bütün mərhələlərində öz xalqına sonsuz məhəbbət və sədaqət hissi ilə, qurub-yaratmaq amalı ilə yaşamış, özünün zəngin və mənalı həyatı boyu daim xalqını, doğma vətənini düşünmüş, onun inkişafı üçün əzmlə çalışmış və üzləşdiyi çətinliklərdən xilas etmək üçün fədakarlıq göstərmişdir. Bu gün minnətdarlıq hissi ilə qeyd etmək olar ki, müstəqil Azərbaycanın mövcudluğu, qüdrətli bir ölkə kimi təşəkkülü Heydər Əliyev siyasətinin bəhrəsidir və biz hamımız bunun üçün dahi və bənzərsiz insana borcluyuq. Müstəqil Azərbaycan Heydər Əliyevin şah əsəridir, onun öz xalqı qarşısında tarixi xidmətidir.
Daha sonra YAP Şuşa rayon təşkilatının sədri Təvəkkül Əliyev ”Müasir Azərbaycan Ulu Öndər Heydər Əliyevin ideyaları işığında ”, YAP Şuşa rayon təşkilatı Qadınlar Şurasının sədri Vüsalə Fətəliyeva “Ulu Öndər Heydər Əliyev irsində multikultural və tolerant dəyərlər”, Gənclər Birliyinin sədri Yapon Hacıyev “Ulu Öndərin gənclər siyasəti” mövzularında çıxış etmişlər.
Məruzələr ətrafında Millət vəkili Elman Məmmədov, Şuşa RİH-nin başçısının müavini, İdarə Heyətinin üzvü Əkbər Hacıyev, Azərbaycan Respublikasının Prezidenti yanında İdarəçilik Akademiyasının professoru, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin Əlaqələndirmə Şurasının sədri, Qarabağ araşdırmalar mərkəzinin rəhbəri Elçin Əhmədov,YAP Şuşa rayon təşkilatının İdarə Heyətinin üzvü Ramiq Məhərrəmov çıxış etmişlər.
Ümummilli lider Heydər Əliyevin anadan olmasının 93-cü ildönümü ilə əlaqədar “Ən yaxşı təqdimat” müsabiqəsinin respublika mərhələsinin qalibi, 12 nömrəli məktəbin IX sinif şagirdi Aytac Cavadbəyli Ulu Öndərimizə həsr olunmuş şeir söyləmişdir.
Tədbirdə YAP sıralarına qəbul olunmuş bir qrup gəncə üzvlük vəsiqələri təqdim olunub, Ulu Öndərin ad günü ilə bağlı keçirilmiş, futbol, şahmat yarışlarının qalibləri, eyni zamanda “Ən yaxşı təqdimat” müsabiqəsinin respublika mərhələsinin qalibi qiymətli hədiyyələrlə mükafatalandırılmışdır.
