44 günlük Vətən müharibəsi şəhidi İbrahimov İsrafil Zülfüqar oğlunun ad günü yüksək səviyyədə qeyd edilmişdir
44 günlük Vətən müharibəsi zamanı şücaət göstərərək şəhidlik zirvəsinə ucalmış İbrahimov İsrafil Zülfüqar oğlunun ad günü yüksək səviyyədə Muğam evində qeyd edilmişdir.
Tədbirdə şəhidin ailə üzvləri, Şuşa Rayon İcra Hakimiyyətinin başçısı Bayram Səfərov, Nərimanov Rayon İcra Hakimiyyətinin başçısı Elgin Həbibullayev, İcra Hakimiyyətinin məsul işçiləri, Nərimanov rayon Polis şöbəsinin rəisi, idarə, müəssisə rəhbərləri, şəhid ailələri, qazilər, onunla birlikdə döyüşlərdə şəhid olan həmvətənlərimizin valideynləri, Azərbaycan Respublikasının xalq və əməkdar artistləri, mədəniyyət işçiləri iştirak etmişdir. Çıxış edənlər İbrahimov İsrafilin döyüş yoluna nəzər salaraq, onun vətən naminə göstərdiyi qəhrəmanlıqdan, xalqa və dövlətə bağlılığından, onun vətən sevgisindən geniş söhbət açmış, ölkəmizin qalib olduğu haqq savaşında şəhidin unudulmaz fədakarlıqları olduğunu diqqətə çatdırmışdır. İbrahimov İsrafil Zülfüqar oğlu 16 oktyabr 1997-ci ildə Bakı şəhərində anadan olmuş, Vətən müharibəsində iştirak edərək döyüşlərdə böyük igidlik göstərmişdir.
27.10.2020-cu ildə Laçın rayonu, Səfiyan kəndi uğrunda gedən döyüşlərdə rəşadət göstərərək şəhidlik zirvəsinə ucalmışdır. Azərbaycan Respublikası Prezidentinin Sərəncamları ilə İbrahimov İsrafil Zülfüqar oğlu ölümündən sonra “Vətən uğrunda” medalı, “Cəbrayılın azad olunmasına görə” medal, “Qubadlının azad olunmasına görə” medal, “Laçının azad olunmasına görə” medal, “Cəbrayılın azad olunmasına görə” medalları və “Vətənə xidmətə görə 3-cü dərəcəli” ordeni ilə təltif edilmişdir.
