8 noyabr - Zəfər günü münasibəti ilə şəhid ailələri və qazilərin iştirakı ilə bayram tədbiri keçirildi

Azərbaycan Respublikasının Dövlət himni səsləndirildikdən və şəhidlərin əziz xatirəsi bir dəqiqəlik sükutla yad edildikdən sonra tədbiri giriş nitqi ilə açan Şuşa Rayon İcra Hakimiyyətinin başçısı Bayram Səfərov xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-nin respublikamızda Zəfər Günü kimi qeyd edildiyini vurğulayıb. Bayram Səfərov bu Şanlı Qələbə münasibətilə başda Azərbaycan Respublikasının Prezidenti, Ali Baş Komandan cənab İlham Əliyev olmaqla şəhid ailələrinə, qazilərimizə öz təbriklərini çatdırdı. Bayram süfrəsi ətrafında davam etdirilən tədbirdə çıxış edən idarə, müəssisə rəhbərləri, şəhid ailələrinin üzvləri və qazilər möhtəşəm Qələbəmizin şanlı tariximizin ən böyük hadisəsi olduğunu, xalqımıza bəxş etdiyi böyük Qələbəyə, Azərbaycanımızın daha da qüdrətlənməsi və çiçəklənməsi naminə şərəfli fəaliyyətinə, işğaldan azad olunmuş torpaqlarımızda aparılan iri həcmli quruculuq-abadlıq işlərinə, habelə şəhid ailələrinə və qazilərə göstərdikləri böyük qayğı və diqqətə görə möhtərəm Prezidentimiz İlham Əliyevə dərin təşəkkürlərini və sonsuz minnətdarləqlarını bildiriblər. Tədbirin bədii hissəsində Müdafiə Nazirliyinin hərbi orkestrinin solisti Vüsal Ağayevin, Şuşa Humanitar Kollecinin tələbəsi Nurlan Səfərovun, Bülbülcan adına musiqi məktəbinin müəllimi Xəyalə Əliyeva və Səyavuş Mediyevin ifalarında səsləndirilən vətənpərvərlik ruhunda mahnılar, Malıbəyli kənd Uşaq musiqi məktəbinin "Şuşanın dağları" ansamblının ifasında təqdim edilən "Zəfər" kompazisiyası tədbir iştirakçıları tərəfindən maraqla qarşılandı. Bayram tədbirinin sonunda şəhid ailələri və qazilərə hədiyyələr təqdim edildi, onlarla xatirə şəkili çəkdirildi.