Ahıl şəxslərin cəmiyyətə inteqrasiyası məqsədilə Şuşa Rayon İcra Hakimiyyəti tərəfindən tədbir keçirilmişdir
Şuşa Rayon İcra Hakimiyyəti tərəfindən ahıl şəxslərin cəmiyyətə inteqrasiyası məqsədilə müvafiq tədbirlərin görülməsi Dövlət Proqramına uyğun olaraq həyata keçirilir.
29.09.2023-cü il tarixdə “1 oktyabr - Beynəlxalq Ahıllar günü” Şuşa Rayon İcra Hakimiyyəti tərəfindən geniş şəkildə qeyd edilib. Tədbirdə ahılların cəmiyyətin bərabərhüquqlu vətəndaşları olmalarından, onlara ehtiram göstərməyin yüksək insani keyfiyyət olmasından bəhs edilib. Bununla yanaşı, yaşlıların həyat təcrübəsindən, bilik və bacarıqlarından bəhrələnmək barədə, o cümlədən onların nəsillər arasında körpü yaratmaq, varislik əlaqəsini bərpa etmək baxımından zəruri xidmətlərindən söz açılıb.
Sabunçu rayonu, Ramana qəsəbəsində yerləşən Malıbəyli kənd uşaq musiqi məktəbində keçirilən tədbir maraq dolu anlarla yadda qalıb. Keçirilən tədbirdə ahıl şəxslər işlədikləri illərlə bağlı öz xatirələrini bölüşüb, vətənə, xalqa xidmət etməyin ən şərəfli peşə olduğunu bildiriblər.
Tədbirdə çıxış edən Şuşa RİHB-nin müavini – İctimai - siyasi və humanitar məsələlər şöbəsinin müdiri Vüsalə Fətəliyeva "Ahıl vətəndaşların sosial müdafiəsinin gücləndirilməsi üzrə Dövlət Proqramı"ndan, habelə bir sıra dövlət proqramlarına uyğun olaraq, ahılların sosial müdafiəsi sahəsində mühüm işlər görülməsini bildirmiş, həmçinin ahılları bu əlamətdar gün münasibətilə təbrik edib, ölkəmizdə ahıllara göstərilən böyük diqqət və qayğıdan danışıb, respublikamızda ahıl insanlara dövlət qayğısının ildən-ilə artdığını bildirmişdir.
