Atmosfer havasının çirklənməsi üzrə avtomatik monitorinq şəbəkəsinin və vahid məlumat bazasının genişləndirilməsi ilə əlaqədar maarifləndirmə tədbiri keçirilmişdir
“Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın təsdiq edilməsi haqqında Azərbaycan Respublikasının Prezidenti cənab İlham Əliyevin Sərəncamına əsasən Şuşa Rayon İcra Hakimiyyətinin təşkilatçılığı ilə idarə, müəssisələrdə, məktəblərdə Atmosfer havasının çirklənməsi üzrə avtomatik monitorinq şəbəkəsinin və vahid məlumat bazasının genişləndirilməsi ilə əlaqədar maarifləndirmə tədbiri keçirilmişdir. Tədbirlərdə Rayon İcra Hakimiyyətinin məsul işçiləri, idarə, müəssisə rəhbərləri, şagirdlər, müəllimlər iştirak etmişdir.
Keçirilən tədbirlərdə vurğulanmışdır ki, Atmosfer havasının çirklənməsinin monitorinqi “Ətraf mühitin mühafizəsi haqqında”, “Hidrometeorologiya fəaliyyəti haqqında”, “Atmosfer havasının mühafizəsi haqqında”, “Ekoloji təhlükəsizlik haqqında” Azərbaycan Respublikasının qanunları və bu qanunların icrasını tənzimləyən Azərbaycan Respublikası Nazirlər Kabineti tərəfindən 01 iyul 2004-cü ildə 90 saylı qərarla təsdiqlənmiş “Ətraf mühitin və təbii ehtiyatların dövlət monitorinqinin aparılması qaydaları haqqında” Əsasnamə ilə həyata keçirilir. Bu sahədə dövlət nəzarətini Azərbaycan Respublikasının Ekologiya və Təbii Sərvətlər Nazirliyi həyata keçirir. 2021-ci ildən etibarən atmosfer havasının keyfiyyətinin monitorinqi 6 ədəd avtomatik onlayn rejimdə çalışan stansiya və stasionar müşahidə məntəqələri ilə əhatə olunmamış ərazilərdə Səyyar Laboratoriya vasitəsilə həyata keçirilir.
Şuşa şəhəri ərazisində hidrometeoroloji şəbəkənin bərpası istiqamətində bütün lazımi sensorlarla təchiz edilmiş avtomat meteoroloji stansiyanın quraşdırılması işləri yekunlaşdırılıb. Bu stansiyanın quraşdırılması ilə Şuşa rayonunun iqlim şəraitinin qiymətləndirilməsinə, meteoroloji proqnoz və xəbərdarlıqların dəqiqliyinin artırılmasına nail olunub. Regionda hidrometeoroloji xidmət səviyyəsinin artırılması rayon ərazisində fəaliyyəti nəzərdə tutulan istehsal və kənd təsərrüfatı sahələri üçün çox faydalıdır.
Avtomatik stansiyalardan atmosfer havasının keyfiyyəti üzrə əldə olunmuş monitorinq nəticələri vasitəsilə gündəlik olaraq havanın keyfiyyəti qiymətləndirilir.
Hava keyfiyyəti üzrə aparılmış monitorinqlər demək olar ki, Avropa İttifaqının tələblərinə uyğunlaşdırılıb, ölçmələr referans metodla həyata keçirilir. Hazırda real vaxt ərzində hava keyfiyyətinə dair məlumatlar əlçatandır və məlumat mübadiləsi vahid bazadan idarə edilir.
Tədbirdə çıxış edənlər Hidrometeoroloji müşahidə və ətraf mühitin monitorinqi sisteminin təkmilləşdirilməsi məqsədilə Atmosfer havasının çirklənməsi üzrə avtomatik monitorinq şəbəkəsinin və vahid məlumat bazasının genişləndirilməsinin prioritet fəaliyyət istiqaməti kimi müəyyənləşdirilməsinin vacibliyini vurğuladılar. Tədbirin sonunda mövzu ətrafında rayon ictimaiyyətini maraqlandıran suallar cavablandırılmışdır.
