Korrupsiyaya qarşı mübarizə tədbirləri ilə əlaqədar müşavirə keçirilmişdir

Şuşa Rayon İcra Hakimiyyətində rayon rəhbərliyinin, rayonun hüquq-mühafizə orqanlarının, təhsil şöbəsinin və onun tabeliyində olan təhsil müəssisələrinin, korrupsiya və rüşvət kimi neqativ hallara qarşı mübarizə, həyata keçirilən profilaktik tədbirlər mövzusunda geniş tərkibli müşavirə keçirilib. Tədbiri giriş sözü ilə açan Rayon İcra Hakimiyyətinin başçısı Bayram Səfərov bildirib ki, Prezident İlham Əliyevin rəhbərliyi ilə ölkəmizdə həyata keçirilən sosial-iqtisadi islahatlar nəticəsində əldə edilən nailiyyətlərin möhkəmləndirilməsi baxımından korrupsiyaya qarşı mübarizə mühüm əhəmiyyət daşıyır. Bununla yanaşı, korrupsiyaya qarşı mübarizə tədbirləri dövlət orqanlarının fəaliyyətinin müasir tələblərə uyğun olaraq qurulması və dövlət orqanlarına ictimai etimadın gücləndirilməsi baxımından da zəruridir. Eləcə də dövlət orqanlarının fəaliyyətində hesabatlılığın və məsuliyyətin artırılması, dövlət əmlakının düzgün idarə olunması sahəsində yeni çağırışlar da korrupsiyaya qarşı mübarizə fəaliyyətinin sistemli və davamlı şəkildə aparılmasını şərtləndirir. Qeyd edilib ki, respublikamızda korrupsiyaya qarşı mübarizənin hüquqi və strateji əsası Ümummilli Lider Heydər Əliyev tərəfindən qoyulub, cənab Prezident İlham Əliyevin rəhbərliyi dövründə bu fəaliyyət özünün ən yüksək mərhələsinə çatıb, dövlət qurumlarında yeni elektron xidmət mexanizmlərinin tətbiqi şəffaflığın təmin olunmasında mühüm rol oynayıb. Dövlətimiz tərəfindən şəffaflığın artırılması və korrupsiyaya qarşı mübarizə sahəsində davamlı həyata keçirilən strategiya nəticəsində ölkəmizin böyük uğurlar əldə etdiyi bildirilib, korrupsiya və rüşvətxorluqla məşğul olmağın hüquqi məsuliyyəti barədə tədbir iştirakçılarına dolğun məlumat verilib. Müşavirədə  çıxış edənlər bildirdilər ki, islahatlar korrupsiyanı cəmiyyətimizin ictimai həyatından sıxışdırıb çıxarmağa xidmət edir. Bu mübarizədə ictimaiyyət nümayəndələrinin üzərinə düşən vəzifələr izah edilib, qurumlara daxil olan hər bir müraciətin ciddi şəkildə araşdırılacağı vurğulanıb. Cəmiyyətin mənəvi sağlamlığının keşiyində müəllimlərin dayandığını qeyd edən çıxışçılar bu sahədə çalışan hər bir insanın öz işinin məsuliyyətini dərk etdiyini və öhdəsindən layiqincə gəlməyə çalışdıqlarını bildiriblər.