Professor Elçin Əhmədov Türk Dünyası Araşdırmaları Beynəlxalq Elmlər Akademiyasının həqiqi üzvü seçilib

Türk Dünyası Araşdırmaları Beynəlxalq Elmlər Akademiyasının iclasında Baş Elmi Şura üzvlərinin qərarı ilə akademiyanın həqiqi üzvü (akademik) seçilmiş professor Elçin Əhmədovun uzun illər Azərbaycan, o cümlədən Qarabağ həqiqətlərinin dünya ictimaiyyətinə, xüsusilə türk dünyasına çatdırılması istiqamətindəki fəaliyyəti, çoxsaylı fundamental elmi əhəmiyyət daşıyan əsərləri yüksək qiymətləndirilmişdir. Bununla yanaşı, bildirilmişdir ki, Şuşada anadan olmuş və böyümüş Elçin Əhmədovun elmi araşdırmaları ilə yanaşı, Azərbaycanın maarifçilik və mədəniyyət beşiyi olan Şuşanın zəngin tarixi irsinin təbliği sahəsində yorulmaz fəaliyyəti, bu qədim şəhərin Azərbaycan tarixindəki rolu barədə müntəzəm olaraq yerli və xarici kütləvi informasiya vasitələrində analitik yazıları Türkiyədə də dailm maraqla izlənməkdədir.

Qeyd edilmişdir ki, Elçin Əhmədovun məhz 2022-ci “Şuşa İli”ndə xarici ölkələrdə 7 kitabının müxtəlif dillərdə nəşr edilməsi yüksək dəyərləndirilir. Sistemli şəkilsə yazılmış bu əsərlərdə Azərbaycanın çoxəsrlik, zəngin şəhərsalma mədəniyyətinin nadir nümunəsi kimi Şuşanın qədim tarixi, bu şəhərdə doğulmuş, həmçinin Azərbaycanın ictimai-siyasi və mədəni həyatında xidmətləri olan Şuşanın görkəmli şəxsiyyətləri, eləcə də memarlıq abidələri haqqında müfəssəl məlumatların verilməsi, o cümlədən həmin ölkələrdə akademik və elmi dairələrin, kütləvi informasiya vasitələrinin iştirakı ilə geniş təqdimatlarının keçirilməsi Azərbaycanın ayrılmaz tərkib hissəsi olan Qarabağın, xüsusilə Şuşanın dünyada təbliği baxımından təqdirəlayiq haldır. Eyni zamnda, bütün bunlar Şuşa şəhərinin yeni, 2023-cü il üçün “Türk dünyasının mədəniyyət paytaxtı” seçildiyi il baxımından da çox əhəmiyyətlidir.

Məlumat üçün bildirək ki, Elçin Əhmədov 1968-ci ildə Azərbaycan Respublikasının Şuşa şəhərində anadan olmuşdur. 1974-1984-cu illərdə Şuşa şəhər 4 №li orta məktəbdə təhsil almışdır. 1989-cu ildə Bakı Dövlət Universitetinin (BDU) tarix fakültəsinə daxil olmuş, 1994-cü ildə həmin fakültəni fərqlənmə diplomu ilə bitirmiş, BDU-da doktoranturaya qəbul olmuş və 1999-cu ilədək Bakı Dövlət Universitetinin “Beynəlxalq münasibətlər” kafedrasında çalışmışdır. 1999-cu ildən indiyə kimi Azərbaycan Respublikasının Prezidenti yanında Dövlət İdarəçilik Akademiyasının “Beynəlxalq münasibətlər və xarici siyasət” kafedrasında professor vəzifəsində işləyir. Eyni zamanda, 2001-2012-ci illərdə Dövlət İdarəçilik Akademiyasının Siyasi idarəetmə fakültəsində dekan müavini, 2017-ci ildən isə həmin fakültədə dekan vəzifəsində çalışmışdır. 2022-ci ildə Dövlət İdarəçilik Akademiyasının nəzdində fəaliyyət göstərən “Qarabağ İrsini Araşdırma Mərkəzi”nin rəhbəri vəzifəsinə təyin edilmişdir. 2015-2019-cu illədə İctimai Televiziyada “Qarabağ həqiqətləri” verilişinin aparıcısı olmuş, 2022-ci ildən isə AZTV-də “Şuşam mənim” verilişinin aparıcı və şərhçisidir.

O, Azərbaycanın xarici siyasəti və Ermənistanın Azərbaycana təcavüzü ilə əlaqədar ümumilikdə, 20 kitab, monoqrafiya, dərslik, dərs vəsaiti, eləcə də 100-dən çox elmi məqalənin müəllifidir. Onun İkinci Qarabağ müharibəsi, Ermənistanın Azərbaycana qarşı ərazi iddiaları və hərbi təcavüzü, Qarabağ münaqişəsinə dair beynəlxalq təşkilatlar və böyük dövlətlərin mövqeyini əks etdirən elmi məqalələri Azərbaycanda, həmçinin ölkə xaricində (Ankara, İstanbul, Sakarya, Elazığ, Kilis, Bişkek, Sofiya, Volqoqrad, Tbilisi, Kişinyov, Moskva, Mexiko, Paris və Romada) “Web of science” məlumat bazasına və “Scopus” sisteminə daxil olan impakt faktorlu jurnallarda nəşr edilməklə yanaşı, 500-dən çox analitik məqalələri müxtəlif kütləvi informasiya vasitələrində türk, rus, ingilis, fransız, ispan, alman, italyan, gürcü və bolqar dillərində yayınlanmışdır. Professor Elçin Əhmədov 50-dən çox müxtəlif beynəlxalq elmi konfrans və simpoziumlarda məruzələrlə çıxış etmiş və müvafiq sertifikatlarla təltif edilmişdir. Onun son bir il ərzində maarifçilik və mədəniyyət mərkəzi olan Şuşanın Azərbaycan tarixinində yeri və rolunu əks etdirən kitabları Bakıda, Tibilisidə, Romada, Afinada, Ammanda, Sofiyada, Riqada, Düşənbədə azərbaycan, ingilis, gürcü, italyan, yunan, ərəb, bolqar, latış və tacik dillərində nəşr edilmişdir.