Ümummilli Lider Heydər Əliyevin 100 illik yubileyi münasibətilə rayon tədbiri keçirilib
07 dekabr 2023-cü il tarixində Şuşa Rayon İcra Hakimiyyətinin təşkilatçılığı ilə müstəqil Azərbaycan dövlətinin qurucusu Ulu Öndər Heydər Əliyevin 100 illik yubileyi münasibətilə rayon tədbiri keçirilib. Tədbirdə şəhid ailələri, qazilər, Milli Məclisin deputatları, dövlət rəsmiləri, Şuşa Rayon İcra Hakimiyyətinin məsul əməkdaşları, elm və incəsənət xadimləri, rayonun idarə, müəssisə rəhbərləri, rayon ziyalıları, gənclər iştirak edirdi.
Azərbaycan Respublikasının Dövlət Himni səsləndirilib.
Ümummilli Liderin və torpaqlarımızın ərazi bütövlüyü uğrunda canlarından keçən Vətən oğullarının əziz xatirəsi bir dəqiqəlik sükutla yad edilib.
Sonra dahi şəxsiyyətin həyat və fəaliyyətindən bəhs edən film nümayiş olunub və slayd formasında tədbirin sonuna qədər davam edib.
Şuşa Rayon İcra Hakimiyyəti başçısının müavini Vüsalə Fətəliyeva “Heydər Əliyev İli” çərçivəsində Respublikanın regionlarında, dünyanın müxtəlif ölkələrində yubiley tədbirlərinin keçirildiyini qeyd etdi. Bu yubiley Vətənimizin, hər bir azərbaycanlının bayramıdır. Vüsalə Fətəliyeva bildirdi ki, davamlı yüksəliş yolunda inamla irəliləyən müasir Azərbaycan Ümummilli Lider Heydər Əliyevin həyat amalının təntənəsidir. Azərbaycana rəhbərliyinin bütün dövrlərində Ulu Öndər Heydər Əliyev özünün qeyri-adi idarəçilik bacarığı, polad iradəsi və yüksək vətənpərvərliyi sayəsində, uzaqgörən və məqsədyönlü qərarları ilə çox qısa müddətdə respublikamızda sosial-iqtisadi, elmi-texniki və mədəni sahələrin inkişafında böyük uğurlara nail olmuşdur. Ulu Öndər özündən sonra Azərbaycana şərəflə, ləyaqətlə və uğurla rəhbərlik edərək xalqın rifahını, dövlətin isə mənafeyini təmin edəcək qətiyyətli lider yetişdirməklə tarixi missiya yerinə yetirdi. Heydər Əliyevin şah əsəri olan müasir müstəqil Azərbaycan Ulu Öndərin layiqli davamçısı Prezident İlham Əliyevin rəhbərliyi ilə möhtəşəm nailiyyətlər qazanaraq regionun lider dövlətinə, etibarlı və perspektivli tərəfdaşa çevrilib, qalib ölkə adı və statusu qazanıb.
Milli Məclisin deputatı, Akademik Ziyad Səmədzadə, Azərbaycan Respublikasının xalq yazıçısı, nasir, publisist Çingiz Abdullayev Ümummilli Liderin çoxşaxəli fəaliyyətindən danışaraq, çıxışlarında qeyd etdilər ki, müasir Azərbaycan dövlətinin memarı və qurucusu, xalqının və dövlətinin müstəqilliyi, inkişafı naminə çox böyük işlər görmüş Heydər Əliyev hər zaman iftixar hissi ilə xatırlayacağımız dahi şəxsiyyətdir.
Tədbir geniş konsert proqramı ilə davam etdi.
Şuşa Rayon İcra Hakimiyyətinin başçısı Bayram Səfərov bildirdi ki, Ümummilli Lider Azərbaycanın bu günü və gələcəyi üçün möhkəm təməllər yaradıb. Azərbaycan Respublikasının Prezidenti İlham Əliyevin rəhbərliyi ilə ölkəmizdə həyata keçirilən məqsədyönlü siyasət və dərin islahatlar nəticəsində əldə edilən çoxsaylı uğurlar sırasında ən uca zirvədə isə 2020-ci ilin 27 sentyabr -10 noyabr tarixinə kimi davam edən 44 günlük Vətən müharibəsində Müzəffər Azərbaycan ordusunun Ermənistan üzərində qazandığı parlaq qələbə dayanır. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə əldə olunan bu qələbə Azərbaycanın dövlətçilik və müharibə tarixinə qızıl hərflərlə yazıldı. Azərbaycanın ərazi bütövlüyü təmin edildi. Bayram Səfərov çıxışının sonunda tədbirdə iştirak edən, qonaqlara, şəhid ailələrinə, qazilərə, döyüşçülərə, Milli Məclisin deputatlarına, dövlət rəsmilərinə, elm və incəsənət xadimlərinə, tədbirin keçirilməsində yaratdıqları şəraitə görə Beynəlxalq Muğam Mərkəzinin rəhbərliyinə, şəxsən Sahib müəllimə, tədbirin aparıcısına, Azərbaycan Nəfəs Alətləri Orkestrinin üzvlərinə, xanəndə və müğənnilərə, tədbirin təşkilatçılarına təşəkkür etdi. Tədbirin sonunda 2020-ci il tarixində Möhtəşəm Qələbə zamanı Şuşaya Azərbaycan bayrağını sancan həmyerlimiz, polkovnik Səbuhi Abdullayevi Şuşa Rayon İcra Hakimiyyəti tərəfindən Fəxri Fərmanla təltif etdi.
