Uşaqların asudə vaxtının səmərəli təşkili, uşaq istirahət yerlərinin, idman və mədəniyyət ocaqlarının fəaliyyətinin təkmilləşdirilməsi məqsədilə tədbir keçirilmişdir
“Uşaqlara dair Strategiyanın həyata keçirilməsi üzrə 2020–2025-ci illər üçün Fəaliyyət Planı”nın təsdiq edilməsi haqqında Azərbaycan Respublikasının Prezidenti cənab İlham Əliyevin Sərəncamına əsasən Uşaqların asudə vaxtının səmərəli təşkili, uşaq istirahət yerlərinin, idman və mədəniyyət ocaqlarının fəaliyyətinin təkmilləşdirilməsi məqsədilə Şuşa Rayon İcra Hakimiyyətinin təşkilatçılığı, Qarabağ Regional Təhsil İdarəsinin Şuşa rayon sektorunun və Qarabağ Regional Gənclər İdman İdarəsinin Şuşa rayon sektorunun iştirakı ilə rayonun ümumtəhsil məktəblərində, Uşaq Gənclər İdman məktəbində “Uşaqların asudə vaxtının səmərəli təşkili haqqında maarifləndirmə” tədbirləri keçirilmişdir. Tədbirlərdə Rayon İcra Hakimiyyətinin, Qarabağ Regional Təhsil İdarəsinin Şuşa rayon sektorunun, Qarabağ Regional Gənclər İdman İdarəsinin Şuşa rayon sektorunun, Uşaq Gənclər İdman məktəbinin məsul işçiləri, məktəblərin pedoqoji kollektivləri, valideynlər, şagirdlər iştirak etmişdir.
Keçirilən tədbirlərdə qeyd edilmişdir ki, uşaqların asudə vaxtlarının səmərəli təşkili, düşünülməsi olduqca vacib olan məqamlardan biridir. Çünki sağlam gəncliyin təməli düzgün təşkil olunmuş asudə vaxt ilə qoyulur. Bütün yaş dövrləri üçün uşağın asudə vaxtının səmərəli dəyərləndirilməsinin ən ideal məşğuliyyəti mütaliə etməkdir. Bu zaman valideynlər övladının yaşını nəzərə almaqla doğru kitab seçiminə diqqət etməlidir. Uşaqların asudə vaxtının səmərəli təşkil olunmasında musiqinin də özünəməxsus rolu var. Belə ki, musiqi insanda mənfi enerjinin azalmasına, müsbət enerjinin artmasına səbəb olur. Asudə vaxtlarında musiqi ilə məşğul olan uşaqlarda dinləmə mədəniyyəti, əgər bir musiqi alətindən istifadə edirsə, onda ritm tutmaq, melodiyanı qavramaq qabiliyyəti inkişaf edir, ixtiyari diqqət güclənir. Asudə vaxtın səmərəli təşkili baxımından şahmat oyununun faydalarını da xüsusi vurğulamaq lazımdır. Boş vaxtını şahmat oynayaraq keçirən uşağın tez qərar qəbul etmək qabiliyyəti inkişaf edir. Asudə vaxtın səmərəli təşkili uşaqların istər fiziki, istərsə də psixi sağlamlığı baxımından böyük əhəmiyyət kəsb edir. Yeniyetmə və gənclərin asudə vaxtının keçirildiyi şərait ilə bu vaxtın idarə olunması problemi ilə sıx əlaqədardır. Şəhər və kənd məktəblərində, ailədə, ailədən kənarda, dərsdənkənar və məktəbdənkənar yerlərdə asudə vaxtın idarə olunması problemin, asudə vaxtın bölüşdürülməsi, ondan səmərəli istifadə olunmasının təmin edilməsi və s. mühüm yerlərdən birini tutur. Yeniyetmə və gənclərin asudə vaxtının oyun şəklində təşkili onların əla istirahət etmələri üçün əsas amildir. Bu baxımdan istər ümumtəhsil müəssisələrində, istərsə də idman, mədəniyyət müəssisələrində uşaqların asudə vaxtlarının səmərəli keçirilməsi üçün lazımi şərait yaradılmalıdır.
