Şuşa rayonu üzrə 2016-ci ilin 9 ayının yekunları və qarşıda duran vəzifələrə həsr olunmuş hesabat yığıncağı keçirildi
19 oktyabr 2016-cı il tarixində Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2016-cı ilin 9 ayının sosial-iqtisadi inkişafın yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr Şuşa rayon İcra Hakimiyyəti Başçısı yanında Şura iclasında ətraflı müzakirə olunmuşdur.
İclasda Şuşa rayon İcra Hakimiyyətinin başçısı Bayram Səfərov, şura üzvləri, rayonun hüquq-mühafizə orqanlarının, idarə, müəssisəvə ümumtəhsil müəssisələrinin rəhbərləri, həmçinin ziyalılar iştirak etmişlər.
İclası giriş sözü ilə açan Şuşa rayon İcra Hakimiyyətinin başçısı Bayram Səfərov Nazirlər Kabinetinin 2016-cı ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunan iclasında dövlət başçısının qarşıya qoyduğu vəzifələrdən danışdı. B.Səfərov bildirdi ki,cari ilin sosial-iqtisadi inkişafın yekunlarına və qarşıda duran vəzifələrə həsr olunmuş Nazirlər Kabinetinin iclası Cənubi Qafqazın ən nüfuzlu ölkəsi kimi tanınanrespublikamızın inamla inkişaf etdiyini göstərdi. Bir çox dünya ölkələrində qlobal maliyyə-iqtisadi böhranının ciddi təsirlərinin müşahidə olunduğu bir şəraitdə Azərbaycanda xalqın rifahının yüksəldilməsinə yönəlmiş sosial-iqtisadi siyasət ötən doqquz ayda da öz müsbət nəticələrini verib.Bu dövrdə qeyri-neft sektoru 3,6 faiz, kənd təsərrüfatı 2,4 faiz artıb. Sənaye potensialımız 0,2 faiz artmışdır.Cənab İlham Əliyevin təşəbbüsü və rəhbərliyi altında ölkədə işsizlik probleminin həlli, yeni sosial infrastruktur obyektlərinin – təhsil, mədəniyyət, səhiyyə, rabitə müəssisələrinin qısa müddət ərzində tikilərək istifadəyə verilməsi, su, qaz, elektrik, rabitə xətlərinin çəkilişi son nəticədə Azərbaycan əhalisinin rifahının yaxşılaşmasına xidmət edir. Sosial layihələr uğurla icra edilir. Ötən müddətdə 29 məktəb tikilib, 485 məktəbdə təmir işləri aparılıb, 33 səhiyyə obyekti inşa olunub, təmir edilib. Bu müddətdə 154 min iş yeri açılıb ki, onlardan da 121 mini daimidir. Bütün bunlar ölkədə həyata keçirilən çoxşaxəli dövlət siyasətinin əsasında insan və şəxsiyyət amilinin dayandığını bir daha təsdiqləyir.
Cənab Bayram Səfərov 2016-cı ilin doqquz ayında rayonumuzun sosial-iqtisadi vəziyyəti haqqında statistik göstəriciləri iclas iştirakçılarının nəzərinə çatdırmışdır.
01 oktyabr 2016-cı il tarixə Şuşa rayon əhalisinin sayı 33125 nəfər olmuşdur ki, onlardan 24137 nəfəri şəhər, 8988 nəfəri isə kənd əhalisidir.
Rayon üzrə 9 ay ərzində 64 nəfər işlə təmin olunmuşdur. 2016-cı ilin 01 oktyabr tarixi vəziyyətinə əsasən məşğul əhalinin sayı 16010 nəfərdir. Onlardan 7260 nəfəri dövlət, 8750 nəfəri isə qeyri-dövlət sahəsində çalışanlardır. Fərdi məşğul əhalinin sayı 4871 nəfərdir. Rayon üzrə qeydiyyatda olan idarə, müəssisələrdə büdcə təşkilatlarında çalışanların sayı 2092 nəfər olmuşdur.Dövlət Sosial Müdafiə Fondunun Şuşa rayon şöbəsində vahid pəncərə sisteminin tətbiqi nəticəsində 2016-cı il 01 oktyabr tarixinə 1556 təşkilat qeydiyyatdan keçmişdir ki, bundan da 138-i hüquqi, 1418-i isə fiziki şəxslərdir. Qeydiyyatda olan təşkilatlardan 43 hüquqi və 295 fiziki şəxs fəaliyyət göstərir. 3927 nəfər pensiyaçıdan 1582 nəfəri yaşa, 2109 nəfəri əlilliyə, 236 nəfəri isə ailə başçısını itirməyə görə pensiya alırlar. 2016-cı ilin 9 ayı ərzində 107 nəfərə pensiya təyin olunmuşdur. Digər rayonlarda yaşayan Şuşa rayon sakinlərindən 10 nəfərin pensiya işi rayon şöbəsində uçota götürülmüşdür.Hesabat dövrü ərzində 97 aztəminatlı ailəyə ünvanlı sosial yardım təyin olunmuşdur. Bu ilin fevral ayının 15-dən sosial yardımlar Əmək və Əhalinin Sosial Müdafiəsi Nazirliyi tərəfindən mərkəzləşdirilmiş informasiya sistemi vasitəsi ilə elektron qaydada həyatat keçirilir. Dövlət Sosial Müdafiə Fondunun Şuşa rayon şöbəsi üzrə yardım alanların ümumi sayı 319 aztəminatlı ailədən ibarətdir.
Şuşa rayon Məşğulluq Mərkəzi tərəfindən 2016-cı ilin 9 ayı ərzində 193 nəfər işaxtaran vətəndaş qeydiyyata alınmış, 34 nəfər müxtəlif sahələrdə işlə təmin olunmuş, 29 nəfərə işsizlik müavinəti təyin edilmişdir. 47 nəfər qeyri-məşğul vətəndaş Bakı Regional Peşə Tədris Mərkəzində peşə hazırlığı keçmişdir.
Şuşa rayon Qeydiyyat şöbəsi tərəfindən 2016-cı ilin 9 ayı ərzində 122 - doğum, 40 - nikah, 15 - nikahın pozulması, 5-adın, ata adının, soyadın dəyişdirilməsi, 22 müraciət atalığın müəyyən edilməsi ilə bağlı qeydə alınmışdır.
Şuşa rayon Rabitə Qovşağının gəliri 2016-cı ilin ilk 9 ayı üçün nəzərdə tutulan 5720,0 manat proqnoza qarşı 5735,0 manat yerinə yetirilmişdir.
Şuşa Humanitar Kollecinə 9 ixtisas üzrə 2016-2017-ci tədris ilində ümumi orta təhsil bazasından 175, tam orta təhsil bazasından 80 nəfər daxil olmuşdur. Şuşa Musiqi Kolleci Şuşa Humanitar Kollecinə birləşdikdən sonra tələbələrin ümumi sayı 920 nəfər olmuşdur.
Şuşa rayonunun 21 orta məktəbində 4008 nəfər şagird təhsil alır. Onların təlim-tərbiyəsi ilə 480 nəfər müəllim məşğul olur. Bu il orta məktəbi bitirmiş 153 nəfərdən 94 nəfəri ali məktəbə qəbul olunmaq üçün sənəd vermiş, onlardan 54 nəfəri tələbə adını qazanmışdır. Şuşa Uşaq Yaradıcılıq Mərkəzində 195 nəfər, Uşaq Gənclər İdman məktəbində isə 240 nəfər şagird asudə vaxtlarını səmərəli şəkildə keçirmək üçün müxtəlif dərnəklərdə məşğul olurlar. Onlarla 15 nəfər müəllim məşğul olur.Malıbəyli kənd orta məktəbinin müəllimi İbrahimova Nailə Binnət qızı Respublikanın “Əməkdar müəllimi” fəxri adına layiq görülmüşdür. Təhsil Nazirliyi tərəfindən rayonun 6, 7, 9, 10, 11, Malıbəyli kənd 1 nömrəli, Quşçular kənd məktəblərində təmir işləri aparılmışdır. Məktəblər tam şəkildə inventar və avadanlıqlarla təmin edilmişdir.
Şuşa Mərkəzi Rayon Xəstəxanası tərəfindən 2016-cı ilin 9 ayı ərzində 35632 müayinə və müalicə işi aparılmışdır. Qeydiyyatda olan 273 nəfər (2015-ci ildə 256) şəkərli diabet xəstəsinə hər ay büdcə hesabına şəkərsalan dərmanlar və 35 nəfərə şəkər təyin edən aparatlar paylanmışdır. Gigiyena və Epidemiologiya Mərkəzi “Ramana-450” qəsəbəsində profilaktiki peyvənd işlərini, Pirşağı qəsəbəsində dezinfeksiya tədbirlərini təşkil etmişdir. Poliklinikanın yerləşdiyi sahə genişləndirilmiş və hal-hazırda təmir işləri davam etdirilir.
Mədəniyyət və Turizm şöbəsi 2016-cı ilin 9 ayı ərzində 50-dən çox tədbir həyata keçirmişdir.Hesabat dövrü ərzində şöbənin musiqi kollektivləri 1 beynəlxalq müsabiqədə və 3 festivalda rayonumuzu təmsil etmiş və nailiyyətlər əldə etmişlər. Şöbənin 3 nəfər əməkdaşı - Yaşar İbrahimov, İntiqam Abbasov və Heybətqulu Babayev bu günlərdə Azərbaycan Respublikası Mədəniyyət və Turizm Naziriliyinin “Fəxri Mədəniyyət işçisi” medalına layiq görülmüşlər.
Şuşa Dövlət Musiqili Dram Teatrı tərəfindən 2016-cı ilin 9 ayı ərzində 85 tamaşa göstərilmişdir. Hərbi vətənpərvərlik tədbirlərinə daha çox önəm verən Teatrın kollektivi ordumuzun qələbə ruhunu əks etdirən “Aprelin dörd günü” adlı musiqili ədəbi – bədii kompozisiya hazırlamış və respublikanın müxtəlif bölgələrində "Vətən dərsi" layihəsi çərçivəsində nümayiş etdirmişlər.Teatrın binasında təmir işləri davam etdirilir.
Hesabat dövründə Gənclər və İdman idarəsi tərəfindən rayon gənclərinin milli-mənəvi və ümumbəşəri dəyərlərə hörmət ruhunda tərbiyə olunması, cəmiyyətin ictimai-siyasi və mədəni həyatında fəal iştirakının təmin edilməsi məqsədilə bir sıra tədbirlər həyata keçirilmişdir. Şuşa rayonundan olan 7-14 yaş arası uşaq və yeniyetmələr Respublika Uşaq istirahət və Sağlamlıq Mərkəzində yay-istirahət düşərgəsində istirahətə göndərilmişdir. Avqust ayında Şuşa rayon İcra Hakimiyyəti və Şuşa rayon Gənclər və İdman İdarəsinin dəstəyi ilə Şuşa rayon gənclərindən ibarət “Şuşa” komandası “Breyn Rinq” intellektual televiziya verilişində iştirak etmiş və region komandaları arasında xüsusi fərqlənən komanda olmuşdur.
Rayonda vətəndaşların qəbuluna, müraciətlərinə baxılmasına həssaslıqla yanaşılır. Onların təklif, ərizə və şikayətlərinə qanunamüvafiq qaydada baxılması, narahatlıq yaradan problemlərin öyrənilməsi və həlli istiqamətlərində operativ tədbirlər görülür. Vətəndaşlar tərəfindən qaldırılmış problemlərin çoxu həll olunmuş, müəyyən problemlərin həlli ilə bağlı aidiyyəti orqanlar qarşısında məsələ qaldırılmışdır.
Bu ilin sentyabr ayının 26-da ölkəmizin ictimai-siyasi həyatında mühüm və əlamətdar bir hadisə olan Azərbaycan Respublikasının Konstitusiyasına təklif olunan əlavə və dəyişikliklərlə bağlı keçirilən ümumxalq səsverməsi (referendum) demokratik, ədalətli və şəffaf şəkildə keçirilmişdir. Rayon üzrə referendumla bağlı təbliğat işləri yüksək səviyyədə təşkil olunmuş, rayon seçicilərinin 71.4 faizibu referendumda çox böyük səs çoxluğu ilə iştirak etmişdir.
Hesabat dövründə Şuşa rayon İcra Hakimiyyəti tərəfindən bir sıra tədbirlər həyata keçirilmişdir.
İclasda Şuşa rayon Təhsil şöbəsinin müdiri Təvəkkül Əliyev, Mərkəzi Rayon Xəstəxanasının baş həkimi Ramiq Məhərrəmov, rayon İcra Hakimiyyəti başçısının Qaybalı kənd İnzibati ərazi dairəsi üzrə nümayəndəsiRasim Əliyev çıxış etmişdir.
Məsələ ilə bağlı Qərar layihəsi səsə qoyulmuş və qəbul edilmişdir.
